Segundo Conde Mouzo, a Secretaría Xeral de Comunicación márcase dous obxectivos coa exposición. Dunha banda, “conseguir que os visitantes desfruten cunha experiencia nova e diferente á dos museos convencionais ao coñecer as novas tecnoloxías aplicadas ao mundo audiovisual de xeito lúdico”. En segundo lugar referiuse ao feito de que “a mostra serve de escaparate e ponte natural entre o traballo que están a desenvolver as

universidades e as empresas galegas co resto da sociedade”.
Así mesmo, o subdirector xeral  sinalou que a mostra está pensada para que os seus visitantes non sexan simples espectadores, senón que participen en todo o seu percorrido, o que fai que sexa de grande interese didáctico para as persoas de todas as idades.

A exposición, organizada pola Secretaría Xeral de Comunicación, ofrece unha converxencia entre arte e tecnoloxía. Ten como obxectivo achegar o audiovisual e os multimedia á cidadanía e servir de plataforma de experimentación de novos sistemas e contidos audiovisuais realizados por empresas e universidades galegas.

A exposición Galiciadixital, "de entrada gratuíta" segundo os organizadores, estará no Castelo de Castro Caldelas ata o 18 de maio, e é unha réplica da exposición permanente Galiciadixital situada no Mosteiro de San Martiño Pinario de Santiago de Compostela pola que xa pasaron máis de 450.000 visitantes.