"Os traballadores e traballadoras de Seaga, protagonistas da conservación dos nosos montes, son tratados coma persoas vagas mentras non se demostre o contrario, así é o parecer do persoal ante o maltrato que están sufrindo polos xestores da empresa", sinala Comisións Obreiras despois de ter constancia da sanción imposta a traballadores dunha brigada de extinción de incendios forestais.
A sanción foille imposta ao pararse nun establecemento para facer provisión de viandas, entre elas pan, para facer bocadillos. A brigada tivo a mala sorte de dar no interior do establecemento cun xefe de SEAGA, que automáticamente instruíu a correspondente sanción de suspensión de emprego e soldo a tódolos integrantes da brigada, maior no caso do xefe e responsable da mesma.
"Estes xestores preocúpanse de cuestións nimias, coma prohibir comprar no horario laboral uns bocadillos, pero dalles o mesmo que o persoal vaia a vixiar os montes de noite, sen lanternas", denuncia Comisións Obreiras.
O sindicato denuncia que os mesmos que sancionan aos traballadores por comprar o imprescindible para facer unhos bocadillos, "obrigan ao persoal á ter posto durante todo o horario laboral, incluso no seu momento de descanso, a roupa de traballo (funda e botas), independentemente do tipo de actividade que estén realizando. Pero non poñen o dispor dos traballadores e traballadoras instalacións axeitadas para vestiarios, polo que teñense que ir, en moitas ocasións, a cambiarse á sua casa. Incluso a día de hoxe o persoal descoñece que quendas de traballo (maña, tarde e noite) deben realizar no mes de agosto e en que días concretos deberán traballar, o que atenta contra a sua saúde e a conciliación da vida familiar e laboral".
Situacións que, recorda Comisións Obreiras, ten denunciado este sindicato á Inspección de Traballo. |