Por cada euro que a DGT recadou en Galicia durante o ano pasado, 2007, só investiu 10 céntimos en seguridade vial. Así se desprende da resposta que o Goberno deu a unha pregunta do deputado nacionalista Francisco Jorquera, na que Madrid recoñece que os investimentos de Tráfico en seguridade viaria en Galiza ascenderon a 3.100.248 €, mentras que, pola contra, a recadación do Goberno por infraccións ascendeu no mesmo ano a 32.071.731 €. É dicir, dez veces máis.
Ademais, a información do propio Goberno desvela dados que o deputado nacionalista califica de "clarexantes": nos últimos tres anos o investimento de Tráfico en medidas de seguridade viaria en Galiza diminuíu mentres que a recadación medrou.
Así, o investimento en seguridade viaria pasou de 3.378.450 € en 2005 a 3.100.248 € en 2007.
Pola contra, a recadación da Dirección Xeral de Tráfico no noso país medrou nos últimos tres anos, pasando de 27.322.921 en 2005 a 32.071.731 € o pasado ano.
Sinala o deputado nacionalista que, dos datos aportados polo Goberno central despréndese que "o incremento da recadación de Tráfico foi xeneralizado en todas as provincias, en especial nas de Lugo e Ourense".
Francisco Jorquera considera que “esta situación é inadmisíbel: non é de recibo que cando Galiza sofre un dos índices de sinistralidade viaria máis elevados do Estado, o Goberno Central recoñeza que o investimento en seguridade viaria non só non medrou, senón que diminuíu, mentres que a recadación se incrementou en todas as provincias galegas”.
O portavoz do BNG subliña que Galiza precisa “dunha policía propia que dea resposta a unha realidade, a problemática do tráfico en Galiza é moi diferente: poboación dispersa; rede moi densa de estradas secundarias, con trazados sinuosos, numerosos cruces e travesías; alta porcentaxe de poboación que vive no rural; elevada pluviosidade ou a orografía accidentada.”
|