Para as cinco da tarde deste luns está fixado na Comisión de Fomento do Senado, o debate sobre unha proposta do senador do BNG por designación autonómica, Xosé Manuel Pérez Bouza, para que Fomento constrúa un paso subterráneo na localidade de A Lama, no Concello de O Irixo.
Xosé Manuel Pérez Bouza aclara que "o  BNG comparte a necesidade de que Galiza conte con infraestruturas ferroviarias propias do século XXI e é consciente de que as obras para a súa construción levan molestias para os habitantes das zonas polas que discorre o trazado". Sen embargo, advirte o senador nacionalista de que "o interese público non pode ser unha excusa para xustificar danos innecesarios aos bens e ao benestar dos veciños".

O senador do BNG asegura que este é o caso da aldea de A Lama, no concello do Irixo, onde as obras da liña do AVE Ourense-Santiago "deixaron aos veciños incomunicados, ao pasar a liña do AVE polo medio da aldea; e ademais provocou o desvío de mananciais, cortes de auga e danou a estrutura de varias vivendas".
Pérez Bouza denuncia que, a pesar das reiteradas peticións dos veciños dende o ano 2006 ante o Ministerio de Fomento "a súa situación non variou substancialmente".

Neste sentido, o senador nacionalista reclámalle ao Goberno que atenda a petición dos habitantes de A Lama de construír un paso subterráneo baixo a liña do AVE "para comunicar as dúas partes da aldea e evitar así o gran rodeo que teñen que facer para poderen visitar aos seus veciños e familiares ou mesmo para cultivar as súas leiras".