Con motivo da celebración do Día Mundial da Auga este vindeiro domingo, 22 de marzo, a Concellería de Participación Cidadá do Concello de Ourense pon en marcha unha campaña de sensibilización do uso integral da Auga, xunto coa asociación Ambiental Syme e a colaboración da Consellería de Medio Ambiente e Desenvolvemento Sostible.
A campaña consistirá no desenvolvemento de pequenos foros de participación, que se realizarán nos locais das asociacións de veciños de Ourense que desexen adherirse ó proxecto. Mediante estes foros, ofreceranse conferencias informativas do uso integral da auga, coa explicación do ciclo da auga, ou os custes de potabilización e depuración de augas. Ao remate das mesmas, os veciños poderán facer peticións co obxectivo de axudar na mellora da xestión da auga.

Sinala a Concellería de Participación Cidadán que esta campaña ten como obxectivos "asimilar a importancia do desenvolvemento sostible, comprender o problema da escasez da auga, evitar o consumo abusivo de auga ou inculcar a idea de aforro de auga, entre outros".
Coa intención de incentivar a participación de tódalas persoas que asistan, a Concellería de María Devesa proporcionará gratuitamente aos asistentes bolas de lavado ecolóxicas. Deste xeito, trátase de reducir o emprego dos deterxentes, colaborando no coidado do medio ambiente.