A conselleira de Sandiade, Pilar Farjas, ven de nomear aos responsables da Xerencia do Hospital Comarcal de Valdeorras e de Atención Primaria de Ourense. O primeiro dos cargos recáe en María Jesús Magadán Álvarez, mentras que a Xerencia de Atención Primaria na provincia levaráa Carlos Pereira Fernández.

María Jesús Magadán Álvarez é licenciada en Medicina e Cirurxía pola Universidade de Salamanca, e na súa formación conta con másters en Administración e Xestión Sanitaria en Formación en Medicina de Urxencias. Desenvolveu o seu labor profesional como médico de Atención Primaria e de Urxencias Hospitalarias, e na actualidade é médico inspector na área sanitaria do Barco de Valdeorras.

Doutra banda, Carlos Pereira Fernández incorporarase como xerente de Atención Primaria de Ourense. É licenciado en Medicina e Cirurxía pola Universidade de Santiago de Compostela e ten un máster en Xestión e Administración Sanitaria pola Universidade de Vigo. Na súa traxectoria profesional ten ocupado cargos de responsabilidade no eido da Inspección e a Asistencia Sanitaria, e foi director provincial do Servizo Galego de Saúde de Ourense. Na actualidade exerce como inspector médico.

A Conselleria sinala que os actos oficiais de presentación destes xerentes terán lugar nos vindeiros días.