Este martes inaugurouse no Centro Cultural da Deputación de Ourense a exposición itinerante “As nosas palabras, os nosos mundos”, organizada pola Secretaría Xeral de Política Lingüística da Consellería de Educación e que permanecerá aberta ata o próximo día 19.
“As nosas palabras, os nosos mundos” remata en Ourense o seu periplo por diferentes cidades do mundo, nas que lles trasladou aos miles de visitantes a vitalidade actual da lingua galega e a súa historia. A mostra promovida pola Secretaría Xeral de Política Lingüística pretende, tamén, poñer en valor a riqueza da diversidade dos idiomas do mundo, como vehículos de comunicación e cultura.
Nun espazo expositivo de 500 metros cadrados, os visitantes poderán achegarse ao galego e á diversidade lingüística dunha forma activa, experimental e sensitiva. –galego, castelán, catalán, éuscaro, inglés, francés e neerlandés-flamengo-, aos que se suman outras 25 linguas con presenza na exposición.
A exposición estrutúrase en catro bloques temáticos: “As orixes”, “Isto é galego”, “As nosas palabras, os nosos mundos” e “A nosa lingua na nosa vida”.
O módulo “As orixes” constitúe un achegamento ao nacemento da linguaxe, así como á evolución das canles de comunicación ao longo da historia da humanidade. Nel tamén se ofrece información sobre as 20 familias lingüísticas existentes no mundo.
O segundo módulo, que leva por título “Isto é galego”, permite viaxar pola historia do galego desde a Idade Media ata os nosos días, a través de personaxes e acontecementos culturais, sociais e políticos relevantes. En canto ao espazo “As nosas palabras, os nosos mundos”, o visitante pode mergullarse na diversidade lingüística do planeta e coñecer o son de múltiples linguas a través dun xogo de escoita. Por último, o módulo “A nosa lingua na nosa vida” amosa exemplos de recursos e usos da lingua galega nos diferentes ámbitos da sociedade.
En paralelo á exposición, ofrécese un percorrido a través de Internet no sitio web, o primeiro portal galego sobre diversidade lingüística, con información de interese sobre o galego e o plurilingüismo.
|
|