Na Deputación de Ourense preentouse este luns o libro “As mulleres en Galicia no século XX”, un sinalado estudo dirixido polos os historiadores Jesús de Juana e Julio Prada, que analiza o papel desenvolvido pola muller ao longo do século pasado, analizando os aspectos políticos, sociais, económicos e culturais desde a óptica feminina, así como os diferentes roles que xogou a muller desde comezos de 1900 ata finais do século pasado.
Na presentación da obra, publicada pola editorial Ir Indo e que conta coa colaboración da Deputación e do Campus de Ourense, participaron xunto aos autores, o presidente da Deputación de Ourense, Manuel Baltar; a vicerreitora do Campus de Ourense, María lameiras, e o editor Bieito Ledo.

A muller “merece ter o recoñecemento social na historia que se lle negou durante séculos. A historia estivo escrita maioritariamente por homes, de aí que en moitas ocasións non fose contada desde a perspectiva feminina, e por este e moitos outros motivos, publicacións como esta son necesarias para que a sociedade coñeza o fulcral papel que a muller tivo ao longo da historia, sinaladamente, da historia contemporánea en Galicia", sinalou o titular da Deputación de Ourense.

Pola súa banda, Jesús de Juana destacou o contido investigador da publicación, afirmando que os profesores “temos tamén que realizar ademais da labor docente un traballo de servizo á sociedade publicando traballos que contribúan a afondar e enriquecer, como é o caso, o noso coñecemento sobre a muller nas diferentes sociedades ao longo da historia”.