O presidente da Deputación de Ourense, Manuel Baltar, afirmou este xoves que os concellos que contan con centrais hidroeléctricas teñen dereito a recibir os beneficios que lles corresponden por ter no seu territorio estas infraestruturas, "e cantos máis sexamos, mellor poderemos negociar e defender os intereses municipais, porque esta é unha maneira máis de financiar os gobernos locais".
O dixo Baltar Blanco na xornada informativa que organizou a Deputación de Ourense no Centro Cultural Marcos Valcárcel para dar conta aos alcaldes dos municipios con encoros das últimas novidades no que atinxe a financiamento e aspectos técnicos, económicos e xurídicos. Esta xornada contou coa presenza de Francisco Sánchez e Javier Gonzalo, coordinador e asesor xurídico da federación, respectivamente.

Manuel Baltar, que é presidente da Asociación de municipios con centrais hidroeléctricas en Ourense e membro da comisión executiva nacional, explicou que as empresas hidroeléctricas "xeran unha serie de beneficios económicos que teñen que reverter nos concellos e, por extensión, nos seus cidadáns", e neste senso, engadiu que a Federación nacional de municipios con encoros "abre unha importante porta para a cooperación, porque desa asociación dos concellos nace unha fortaleza que lles permitirá negociar mellor as condicións para que se recoñezan os dereitos que teñen os concellos que contan con este tipo de infraestruturas hidráulicas".

Na provincia de Ourense son 43 os concellos afectados por presas e encoros, e deles, 19 contan con centrais hidroeléctricas, sendo 23 o total de presas e encoros na provincia de Ourense.
Pola súa banda, a Federación de asociacións de concellos con encoros e centrais hidroeléctricas ven traballando dende hai anos –fundouse en marzo de 1995- na defensa dos intereses destes concellos fronte ás grandes multinacionais e empresas hidroeléctricas.