Os proxectos de posta en  valor das fontes termais das Burgas e o seu contorno que desenvolve o Concello de Ourense, deron este xoves un paso importante coa adxudicación por parte da Xunta de Goberno Local de dúas das actuacións que se desenvolverán este ano para o desenvolvemento deste Ben de Interese Cultural.
Son, concretamente, o proxecto arqueolóxico de posta en valor e recuperación dos restos romanos atopados no contorno das Burgas, e o equipamento do Centro de Interpretación Arqueolóxico Termal que se construirá nesta zona.

Estes proxectos serán financiados polo Concello con cargo á subvención nominativa concedida pola Administración do Estado para a posta en valor deste contorno.
O proxecto de posta en valor e recuperación dos restos arqueolóxicos desenvolverase no espazo das traseiras das Burgas. O seu obxectivo é poñer en valor a zona e garantir a conservación dos restos arqueolóxicos atopados nas mellores condicións posibles, e paralelamente acometer as actuacións necesarias para facer accesible este espazo ao público.
A actuación céntrase na recreación da piscina orixinal, e das columnas, piares e estratigrafías do seu contorno e a reproducción do pavimento, os perpiaños de peche da propia piscina e o muro de mampostería de granito e con morteros mixtos de cal e cemento blanco hidrofugados e tintados con pigmentos inorgánicos.

No tocante á subministración dos contidos previstos no proxecto de musealización e posta en marcha do Centro de Interpretación Termal do contorno BIC das Burgas, a Xunta de Goberno Local determinou a súa adxudicación nun total de 65.340 euros.
Trátase do equipamento deste novo espacio que o Concello porá a disposición dos veciños e visitantes da cidade para o coñecemento e divulgación da riqueza e historia termal da cidade. Daralle o contido funcional e a mensaxe discursiva ao futuro centro de Interpretación, que se acondicionará nos baixos sitos na rúa do Vilar, números 6, 8, 10 e 12 de acordo co proxecto redactado polo arquitecto ourensán Manuel Jorreto.

Será un espazo interpretativo expositivo sobre os mananciais mineromedicinais das Burgas e a historia da cidade converténdose nun punto de encontro coa historia e a evolución de Ourense ao longo dos séculos. "Concíbese coma un proxecto divulgativo e didáctico, que proporcione ao visitante unha concepción global do termalismo mediante ferramentas e propostas audiovisuais e interactivas, que nos permitirán coñecer e facer máis comprensible a temática termal e afondar na historia e cultura da nosa cidade", sinala o propio Concello da cidade.