O delegado territorial da Xunta de Galicia en Ourense, Rogelio Martínez, recibiu esta fin de semana no seu despacho á directora de Turismo de Promperú (Comisión para a Exportación e o Turismo de Perú),  María del Carmen de Reparaz.  Unha visita que se enmarca dentro dunha serie de encontros institucionais coas primeiras autoridades desta cidade con motivo da participación de Perú, como país convidado,  na vindeira edición de Termatalia se celebrará en Expourense no mes de setembro, explica ao respecto a delegación Territorial da Xunta en Ourense.

Esta autoridade do Goberno peruano, que ten rango de viceministra, acudiu a Ourense para coñecer in situ a oferta termal da cidade e as características do recinto feiral de Expourense e, deste xeito, planificar a participación da delegación do seu país na vindeira edición de Termatalia.  
Rogelio Martínez coincidiu xa con María del Carmen de Reparaz o pasado mes de setembro na celebración de Termatalia 2012, que por primeira vez tivo lugar no exterior e que escolleu a cidade de Callao, Perú, como escenario desta feira internacional de Turismo de Saúde e Benestar.

Neste novo encontro, volvéronse a repasar as liñas de actuación e os piares nos que se basea a aposta do Goberno galego polo termalismo como oferta turística de calidade: innovación, atracción ao investimento privado, promoción e dinamización do mercado.