Unións Agrarias reclamou para o Ribeiro un contrato homologado que ampare as variedades autorizadas, que representan o 75% da produción de uva desta Denominación de Orixe. De feito, a Organización non asinou o documento proposto na Mesa do Viño do Riberio porque soamente dá cobertura ás castes ou variedades preferentes, que unicamente inclúen o 25% da uva que se colleita na D.O.
"O Sindicato está dacordo coa negociación das variedades preferentes e co prezo establecido, pero condiciona a sinatura deste acordo á negociación dun contrato para as variedades autorizadas, coa finalidade de que o 100% da produción do Ribeiro quede amparada nun auténtico documento contractual", aclara Unións Agrarias.
O non ser así, Unións Agrarias considera que "o contrato non serve para nada, xa que non responde á realidade nin aos intereses dos produtores". En opinión da Organización, só beneficia ás adegas, ás que lles ofrece unha oportunidade de comprar uvas a baixo prezo en perxuizo dos viticultores.
Para UU.AA o desexable sería ter negociado todo conxuntamente e non por partes, porque así os produtores atópanse nunha situación na que están totalmente desprotexidos, mentras as adegas sacan proveito.
Segundo o Sindicato, coas condicións actuais o único que se está a conseguir é que a xente abandone as viñas por falla de viabilidade, de aí a necesidade dun novo contrato para toda a produción, como fórmula para que o Riberio teña continuidade.
|