O delegado territorial da Xunta de Galicia en Ourense, Rogelio Martínez, acompañado polo xefe territorial da Consellería de Traballo e Benestar Social, José Selas, visitou esta mañá o centro Valverde, no concello ourensán de Allariz, unhas instalacións que combinan unha vivenda tutelada cun centro de formación para o emprego. Os menores tutelados acoden aos cursos formativos no mesmo centro onde viven, se ben tamén participan nas actividades formativas outros adultos seleccionados entre os demandantes de emprego. Todos os que superan a formación reciben o correspondente certificado de profesionalidade.

Para o ano 2012 programáronse neste centro, extensión do centro integrado de Formación Profesional (CIFP) Santa María de Europa de Ourense, un total de dez cursos de formación para o emprego, dos que actualmente se están impartindo catro dirixidos a 60 alumnos. Actividades auxiliares en viveiros,xardíns e centros de xardinería, servizos de bar e cafetería e operacións básicas de cociña e de pisos aloxamentos son as materias ofrecidas nestes cursos.

Os menores tutelados unha vez que rematen os cursos recibirán unha cualificación e certificación suficiente para a integración no mercado de traballo e con validez en todo o territorio nacional.
O centro Valverde tamén acolle unha oficina para o asesoramento e a avaliación da acreditación das competencias profesionais adquiridas a través da experiencia laboral. No que vai de ano, foron avaliadas 240 persoas e asesoradas 106 por un total de 28 técnicos.