O Grupo Socialista do Pazo Provincial presentou este xoves unha emenda de substitución en resposta á moción que o BNG presentou nos pasados días e que este venres se debaterá no pleno da Deputación de Ourense correspondente a este mes de xullo.
Nesta moción, os socialistas subliñan a importancia que as entidades locais teñen en España, e, sobre todo, en Galicia, pois permiten "vertebrar o territorio, contribuír á cohesión social e prestar servizos básicos", polo que rexeitan calquera modificación da Lei Reguladora das Bases do Réxime Local e da Lei Orgánica do Réxime Electoral Xeral (LOREG, polas súas siglas en castelán). Deste xeito, o Grupo Provincial Socialista anuncia que defenderá a autonomía municipal como "o instrumento máis eficaz para facer realidade o principio de igualdade de oportunidades", sinala o voceiro socialista, Ignacio Gómez.

Gómez considera que a modificación que o Goberno de España prepara destas dúas leis –e, especialmente, da do Réxime Local– limitan a autonomía municipal, que está recoñecida pola Constitución, e que pretende, como fin último, "restar capacidade de decisión á cidadanía sobre a Administración Local e os seus representantes".
Non obstante, o PSdeG defenderá que calquera modificación xurda do debate político coas corporacións e co mesmo consenso que o acadado no seu día para a redacción da actual lei.
"A Constitución determina no seu artigo 140 que os concellos teñen personalidade xurídica plena, polo que non cabe ningunha expropiación das súas competencias a favor doutras institucións, máxime cando existen municipios pequenos que, de non ser pola labor que realizan os seus concellos, non se podería manter a cohesión do rural e da súa poboación", sinala o voceiro, Ignacio Gómez.

O Grupo Socialista da Deputación sinala que pretende trasladar este acordo ao Goberno de España, ao da Xunta, aos grupos políticos do Congreso, do Senado e do Parlamento,  así como á Xunta de Goberno da FEMP e da FEGAMP.